ताज्या बातम्या
सांगोल्याचा तरुण 27 व्या वर्षी बनला चित्रपट निर्माता ‘अ पेईंग घोस्ट’ चित्रपट 29 मे ला महाराष्ट्रासह इतर राज्यात व परदेशातही होणार प्रदर्शित! // तिहेरी अपघातात हातीदजवळ दोनजण जागीच ठार //

Slider

आपले सांगोला

आपले सोलापुर

Policediary

पोलीस डायरी

आपला जिल्हा

अवती भोवती

सांगोल्याचा तरुण 27 व्या वर्षी बनला चित्रपट निर्माता ‘अ पेईंग घोस्ट’ चित्रपट 29 मे ला महाराष्ट्रासह इतर राज्यात व परदेशातही होणार प्रदर्शित!

सांगोल्याचा तरुण 27 व्या वर्षी बनला चित्रपट निर्माता
‘अ पेईंग घोस्ट’ चित्रपट 29 मे ला महाराष्ट्रासह इतर राज्यात व परदेशातही होणार प्रदर्शित!

सांगोला - सांगोला शहरातील एक तरुण चित्रपट क्षेत्राकडे आकर्षिला गेला, अनेक मालिकांचा निर्मिती प्रमुख बनला आणि आता वयाच्या अवघ्या 27 व्या वर्षी तो चित्रपट निर्माताही झाला. त्याचा ‘अ पेईंग घोस्ट’ हा चित्रपट येत्या 29 मे रोजी संपूर्ण महाराष्ट्रात तसेच कर्नाटक, इंदूर, हैदराबाद आदी 500 ठिकाणांसह युनायटेड किंगडम मधील सहा शहरे तसेच जर्मनी, स्वीत्झर्लंड, स्कॉटलंडमध्येही प्रदर्शित होणार आहे.



जयंत बाबुराव लाडे असे या तरुणाचे नाव असून तो मुळचा सांगोला येथील रहिवासी आहे. त्याने या चित्रपट निर्मितीपूर्वी महादेव, महाभारत, वीरा, आंबटगोड, सतराशे साठ सासूबाई या मालिकांचे निर्मिती प्रमुख म्हणून काम पाहिले आहे. त्याने निर्मित केलेल्या ‘अ पेईंग घोस्ट’ या चित्रपटाचे दिग्दर्शन सुश्रुत भागवत यांनी केले आहे. या चित्रपटात स्पृहा जोशी, उमेश कामत, पुष्कर श्रोत्री, अतुल परचुरे, कांचन पगारे, समीर चौघुले, शर्वाणी पिल्लाई आदींनी भूमिका केल्या आहेत. पटकथा व संवाद लेखन संजय मोने यांनी केले असून वैभव जोशी यांची गीते आहेत. नरेंद्र भिडे यांनी संगीत दिग्दर्शन केले असून अवधुत गुप्ते यांनी गाणी गायली आहेत. लाडे ब्रदर्सच्या बॅनरखाली हा चित्रपट व.पु.काळे यांच्या बदली या प्रसिध्द कथेवर आधारित आहे. कॉमेडी, भूतनाट्य व प्रेमकथा या तिन्हींचा संगम या चित्रपटात पहायला मिळणार आहे. या चित्रपटाचे ग्राफिक्स हॉलिवूडच्या अव्हेंजर व नार्निया फिल्म बनवणार्‍या टीमने केले असून जवळपास 6 महिने चित्रपट निर्मितीचे काम चालले आहे. हा चित्रपट बनविण्यासाठी जयंत लाडे यास त्याचा भाऊ चार्टर्ड अकाऊंट जगदीश लाडे, अजनाळे येथील बाळासाहेब येलपले व वडील सेवानिवृत्त तलाठी बाबुराव लाडे यांनी प्रोत्साहन देवून सहकार्य केले. चौकट - *या चित्रपटाच्या प्रमोशनसाठी चित्रपटाच्या कलाकारांची टीम सध्या संपूर्ण महाराष्ट्रभर फिरत असून दि. 26 व 27 मे रोजी कोल्हापूर-सोलापूरचा दौरा करणार आहे. दि. 27 मे रोजी सकाळी 10 वाजता ही टीम सांगोल्यात येणार आहेत. तरी चित्रपट शौकिनांनी या प्रमोशनसाठी उपस्थित रहावे असे आवाहन निर्माते लाडे ब्रदर्सच्या वतीने करण्यात आले आहे.
चौकट - *येत्या 26 मे रोजी ‘रात्री 9.30 वा. झी टीव्ही’ वरील ‘चला हवा येऊ द्या’ या प्रसिध्द अशा कार्यक्रमात जयंत लाडे व चित्रपटातील कलाकार चित्रपटाच्या प्रमोशनसाठी येणार आहेत. या कार्यक्रमात या चित्रपटाविषयी अधिक माहिती  सिनेरसिकांसाठी उपलब्ध होणार आहे.

तिहेरी अपघातात हातीदजवळ दोनजण जागीच ठार

 तिहेरी अपघातात हातीदजवळ दोनजण जागीच ठार 
सांगोला दि.24 (सा.वा):-भरधाव जाणार्‍या  टेम्पोने समोरुन येणार्‍या ट्रक व टँकरला जोराची धडक दिल्याने झालेल्या तिहेरी अपघातात दोनजण जागीच ठार झाले. ही घटना रविवारी सकाळी 6.30 वा.च्या सुमारास सांगोला-मिरज रोडवरील हातीद येथील घाडगेवस्तीजवळ घडली. या अपघातात अहमद शहाबुद्दी सय्यद-35 व संतोष दिनकर पोतदार-28 दोघेही रा.काळेबोरगाव ता.जि.लातूर असे अपघातात ठार झालेल्या ट्रक चालकाची नावे आहेत.
अपघातानंतर आयशर टेम्पोतील गॅस सिलेंडर रस्त्यावर फेकल्यामुळे सुदैवाने गॅस सिलेंडरचा स्फोट झाला नसल्याने मोठा अनर्थ टळला. आयशर टेम्पो तासगांव येथून सिलेंडर भरुन रविवारी सकाळी साडेसहा वाजणेच्या सुमारास भरधाव वेगाने मिरजकडून सांगोल्याच्या दिशेने येत होता.  दरम्यान ट्रक व टँकर सांगोला-मिरज रोडवरील हातीदच्या घाडगेवस्तीनजीक आले असता मिरजकडून येणार्‍या आयशर टेम्पोने प्रथम ट्रकला उजव्या बाजूने जोराची धडक देवून ट्रकच्या पाठीमागून येणार्‍या डांबराच्या टँकरवर जोराची धडक दिल्याने हा अपघात घडला.  टेम्पो, ट्रक, टँकरची धडक होताच टँकरमधील चालक व क्लिनर केबीनमध्येच मयत अवस्थेत अडकून पडले होते. तर ट्रकमधील बगॅस पोती बाहेर फेकली व टँकरला गळती झाल्याने रस्त्यावरून डांबर वाहत होते. . पो.नि.अजय कदम, सपोनि ज्ञानेश्वर कर्चे, पोलीस कर्मचार्‍यांनी घटनास्थळी धाव घेवून अपघातातील वाहने बाजूला काढून वाहतूक सुरळीत केली.

तालुक्यातील कामांविषयी जिल्हाधिकार्‍यांनी व्यक्त केले समाधान

तालुक्यातील कामांविषयी जिल्हाधिकार्‍यांनी व्यक्त केले समाधान
सांगोलादि. 22 (सा.वा.):-
 * रणरणत्या उन्हात दुपारी दीड ते सव्वाचार असा दौरा करुन मुंढे यांनी विविध कामांची पाहणी केली. * सिमेंट बंधार्‍याचे काम पाहताना त्यांनी टेप मागवून स्वत:च मापे घेवून ती बरोबर असल्याची खात्री केली. * तालुक्यात लोकसहभागातून झालेल्या 6 कोटी रुपयांच्या कामाचे त्यांनी कौतुक केले. 
सांगोला तालुक्यात जलयुक्त शिवार अभियानातर्ंगत सुरु असलेली कामे चांगल्या पद्धतीने सुरु असून नदी पुनर्जीवन, विहीर पुनर्भरण, गाळ काढणे, तसेच नदीजोड प्रकल्प आदी कामे लोकसहभागातून करून पाणी अडविले जाईल व या पाण्याचा उपयोग शेतकर्‍यांना आगामी काळात होईल. माणनदीस मिळणारे सर्व नाले-ओढे जीवंत करुन वाहते केल्यास नदीपरिसरातील लोकांना पाणी टंचाई जाणवणार नाही असे जिल्हाधिकारी तुकाराम मुंढे यांनी पत्रकारांशी वार्तालाप करताना सांगितले. जिल्हाधिकारी तुकाराम मुंढे काल शुक्रवारी सांगोला दौर्‍यावर होते. या दौर्‍यात जिल्हाधिकार्‍यांनी तालुक्यात मोठ्या प्रमाणात सुरु असलेल्या जलयुक्त शिवार अभियानातर्ंगातील पाणलोट विकास कामाची पाहणी केली. त्यांच्या समवेत तहसिलदार श्रीकांत पाटील, जिल्हा कृषी अधिकारी रफीक नायकवाडी, उप विभागीय कृषी अधिकारी शिवराज ताटे, तालुका कृषी अधिकारी अशोक मोरे, गट विकास अधिकारी राहुल गावडे, लघुपाटबंधारे अभियंता विनायक खरात यांच्यासह विविध शासकीय खात्याचे प्रमुख उपस्थित होते. या दौर्‍यात त्यांनी तालुक्यातील य.मंगेवाडी येथे गावओढ्यावर लोकसहभागातून सुरु असलेल्या गाळ काढण्याच्या कामाची पाहणी केली. तसेच स्मशानभूमी शेजारील सिमेंट बंधार्‍याची पाहणी करुन अधिकार्‍यांना सूचना केल्या. त्यानंतर जिल्हाधिकारी तुकाराम मुंढे यांनी राजुरी येथे सुरु असलेल्या कंपार्टमेंट बिल्डिंग, विहीर पुनर्भरण कामाची पहाणी केली करुन त्रुटीसंदर्भात त्यांनी सूचना केल्या. राजुरी येथे सन 2015-16 या आर्थिक वर्षातील पाणलोट कंपार्टमेंट बिल्डिंग कामाचा शुभारंभ जिल्हाधिकारी तुकाराम मुंढे यांच्या हस्ते संपन्न झाला. सुमारे 60 लाख रु.खर्चून याठिकाणी पाणलोट विकासाची कामे हाती घेतली आहेत. येत्या पावसाळ्यापूर्वी दर्जेदार कामे पूर्ण करावयाच्या सूचना मुंढे यांनी केल्या. त्यानंतर त्यांनी राजुरी येथील मातीनाला बंधार्‍याची पाहणी केली. या बंधार्‍याच्या पिचिंगची कामे, सांधे मोड पक्की करण्याच्या सूचना केल्या. त्यानंतर जिल्हाधिकार्‍यांनी वाढेगांव येथील माणनदीच्या पात्राची पहाणी करून माणनदी भ्रमण समितीचे वैजीनाथ घोंगडे यांच्याकडून माणनदीच्या विषयी माहिती घेतली. माणनदीतील झाडे-झुडपे काढून सलग पद्धतीने गाळ काढावा त्याचबरोबर नदी परीसरात वृक्षारोपण करुन नदी प्रदुषण मुक्त करण्यासंदर्भात मार्गदर्शन केले. या कामासाठी जिल्हा नियोजन समितीकडून पोकलेन उपलब्ध करुन दिले. याकामासाठी लोकसहभाग महत्त्वाचा असून तहसिलदारांनी ही कामे त्यांच्या पातळीवर करुन घ्यावीत असे सांगितले. येत्या पावसाळ्यापूर्वी माणनदीपात्रातील गाळ, झाडे-झुडपे काढून प्रदुषण मुक्त करण्याचे आश्वासन तहसिलदार श्रीकांत पाटील यांनी दिले. क्षणचित्रे -

लग्नपत्रिकेच्या माध्यमातून ‘वसुंधरा बचाव’ चा संदेश- शिरभावी येथील ढोले कुटुंबियांचा उपक्रम

लग्नपत्रिकेच्या माध्यमातून ‘वसुंधरा बचाव’ चा संदेश
शिरभावी येथील ढोले कुटुंबियांचा उपक्रम


सांगोला (प्रतिनिधी) - सध्या लग्नसराईचा मोसम असून आपल्या मुला-मुलींच्या लग्नपत्रिका छापण्यासाठी प्रत्येकजण विविध विषयांचा अवलंब करीत असतो. यामध्ये लग्नपत्रिकेवर वधू-वरांचे रंगीत फोटो, नेत्यांचे फोटो, देव-देवतांचे फोटो छापून त्या वाटल्या जातात. परंतु या सर्व गोष्टींना फाटा देत शिरभावीच्या ढोले कुटुंबियांनी ‘वसुंधरा बचाव’ चा संदेश देणारे फोटो छापून हा संदेश घरोघरी पोहोचविला आहे. शिरभावी ता. सांगोला येथील बसवेश्वरआप्पा ढोले महाराज यांची पुतणी चि.सौ.कां. अनिता हिचा विवाह सांगोला येथील मधुकर विश्वनाथ घोंगडे यांचे सुपुत्र चि. अभय यांचेशी 16 मे 2015 रोजी सांगोला येथील गणेश मंदिर मंगल कार्यालयात संपन्न होत आहे. या लग्नसोहळ्याचे औचित्य साधून ढोले महाराजांनी लग्नपत्रिका छापली असून या लग्नपत्रिकेवर त्यांनी चिमण्यांचे फोटो छापून‘‘काका प्लीज आमच्यासाठी थोडेसे पाणी घराच्या बाहेर ठेवा ना!’’ अशा ओळी छापल्या आहेत. तर एका छोट्या गोंडस मुलीचा फोटो व त्याखाली ‘‘बेटी तो कल है’’ व ‘‘ आज बेटी नही बचाओगे तो कल मॉ कहा से पाओगे?’’ असा संदेश छापून ‘‘बेटी बचाव’’ चा नारा दिला आहे. तर पत्रिकेच्या मागील बाजूला त्यांनी विविध पक्षी पाण्यासाठी कसे तडफडतात, पाणी मिळवण्यासाठी कसे प्रयत्न करतात? तसेच वृक्ष तोड न करता त्याचे संरक्षण करा, पशु-पक्षांची शिकार थांबवा, त्यांनाही जगण्याचा आनंद घेवू द्या. असे विविध विषय फोटोसह छापून वसुंधरा बचाव चा संदेश दिला आहे.
त्यांच्या या आगळ्या वेगळ्या उपक्रमाचा लग्नपत्रिकेच्या माध्यमातून ‘‘वसुंधरा बचाव’’ संदेश ढोले कुटुंबियांनी समाजाला दिल्यामुळे सांगोला परिसरात पत्रिकेचा विषय चर्चेचा बनला आहे.

हटकर समाजाचा आळंदी येथे 10 मे रोजी वधुवर परिचय मेळावा

हटकर समाजाचा आळंदी येथे 10 मे रोजी वधुवर परिचय मेळावा
सांगोला दि. 8 (सा.वा.) - हटकर समाजाच्या वतीने येत्या रविवारी 10 मे 2015 रोजी आळंदी देेवाची येथे वधुवर मेळाव्याचे आयोजन केले असल्याची माहिती तुकाराम भुसनर सर व लक्ष्मण निळे यांनी दिली.
पवन मावळ धर्मशाळा मंगल कार्यालय, आळंदी येथे होणार्‍या या मेळाव्यासाठी गृहविभागाचे निवृत्त उपसचिव विरसिंह पाटील, अखिल महाराष्ट्र हटकर समाज संघटनेचे अध्यक्ष पांडूरंग चौगुले, सरचिटणीस नामदेव पाटील, खजिनदार साहेबराव पाटील, कार्याध्यक्ष पांडूरंग पाटील, आदींसह मान्यवर उपस्थित राहणार आहेत. या वधूवर मेळाव्यात सहभागी होवू इच्छिणार्‍या वधूवरांनी मोठ्या संख्येने उपस्थित रहावे असे आवाहन तुकाराम भुसनर सर व लक्ष्मण निळे यांनी केले आहे. अधिक माहितीसाठी लक्ष्मण निळे (9545121508) यांचेशी संपर्क साधावा.

बी.एस.एन.एल.सेवा सलग 25 तास बंद! सेवा खंडीत झाल्याने बहुतांशी बँकाचे कामकाज गुरुवारी पूर्ण दिवस ठप्प!


बी.एस.एन.एल.सेवा सलग 25 तास बंद! सेवा खंडीत झाल्याने बहुतांशी बँकाचे कामकाज गुरुवारी पूर्ण दिवस ठप्प!
कामात हलगर्जीपणा करणार्‍यांवर कारवाई करण्याची आरपीआयचे तालुकाध्यक्ष खंडू सातपुते यांची मागणी
सांगोला दि. 7 (सा.वा.) - बी.एस.एन.एल. ची सेवा मंगळवारी खंडीत झाली होती त्यास 24 तास उलटत नाहीत तोच बुधवारी सायंकाळी 7 वाजण्याच्या सुमारास ही सेवा पुन्हा खंडीत झाल्याने सांगोला तालुक्यातील बहुतांशी बँकांचे व्यवहार गुरुवारी पुन्हा एकदा ठप्प झाले. तुटलेली केबल बदलण्यास किती वेळ लागतो याची चौकशी करुन कामात हलगर्जीपणा करणार्‍यांवर कारवाई करावी अशी मागणी आरपीआयचे तालुकाध्यक्ष खंडू सातपुते यांनी केली आहे. सांगोला तालुक्यातील बी.एस.एन.एल. ची सेवा मंगळवारी पहाटेपासून बंद झाली. मंगळवेढ्याजवळ केबल तुटल्यामुळे ही सेवा खंडीत झाली होती. त्यानंतर लागलीच दुसर्‍या दिवशी म्हणजे बुधवारी सायंकाळी 7 च्या सुमारास ही सेवा पुन्हा बंद झाली. त्याचा परिणाम मोबाईलधारक तसेच लँडलाईन फोनधारकांवर तर झालाच, परंतु ज्या बँकांचे कामकाज बी.एस.एन.एल.च्या इंटरनेट सेवेवर अवलंबून आहे, अशा सर्वच बँकांचे व्यवहार गुरुवारी दिवसभर ठप्प झाले. शहरातील बहुतांशी बँका या बीएसएनएलच्या इंटरनेट सेवेवर अवलंबून आहेत. वारंवार इंटरनेट सेवा बंद पडत असल्याने बँका पूर्ण दिवस-दिवस बंद रहात असल्याने कोट्यावधी रुपयांची उलाढाल ठप्प होत आहे. बँका तसेच एटीएम बंद राहिल्याने त्याचा नाहक त्रास ग्राहकांना होत असल्याचे दिसून येत आहे. मंगळवेढ्याजवळ केबल तुटल्याचे कारण गुरुवारीही सांगण्यात आले. केबल जोडायला किती वेळ लागतो तसेच ते जोडण्याची कारवाई ताबडतोबीने का करण्यात येत नाही? याची चौकशी करुन संबंधित अधिकारी व कर्मचार्‍यांवर वरिष्ठांनी तातडीने कारवाई करावी तसेच यापुढे ही सेवा विनाखंड मिळाली नाही तर कार्यालयासमोर आंदोलनही करु असा इशारा आरपीआयचे तालुकाध्यक्ष खंडू सातपुते यांनी दिला आहे.

बी.एस.एन.एल.ची सेवा खंडीत झाल्याने सांगोला तालुक्यातील बहुतांशी बँक व्यवहार ठप्प!

बी.एस.एन.एल.ची सेवा खंडीत झाल्याने सांगोला तालुक्यातील बहुतांशी बँक व्यवहार ठप्प!
 ऐन लग्नसराईत बी.एस.एन.एल. च्या झटक्याने अनेकांना फटका!
सांगोला दि. 5 (सा.वा.) - बी.एस.एन.एल. ची सेवा खंडीत झाल्याने सांगोला तालुक्यातील बहुतांशी बँकांचे व्यवहार ठप्प झाले. ऐन लग्नसराईत बी.एस.एन.एल. ने झटका दिल्याने अनेकांना याचा फटका बसला.

सांगोला तालुक्यातील बी.एस.एन.एल. ची सेवा मंगळवारी पहाटेपासूनच गूल झाली. मंगळवेढ्याजवळ केबल तुटल्यामुळे ही सेवा खंडीत झाली. त्याचा परिणाम मोबाईलधारक तसेच लँडलाईन फोनधारकांवर तर झालाच, परंतु ज्या बँकांचे कामकाज बी.एस.एन.एल.च्या इंटरनेट सेवेवर अवलंबून आहे, अशा सर्वच बँकांचे व्यवहार ठप्प झाले. शहरातील बँक ऑफ महाराष्ट्र व आय.सी.आय.सी.आय. या दोन बँकांचा अपवाद वगळला तर शहरातील इतर बहुतांशी बँका इंटरनेट सेवा नसल्यामुळे बंद स्थितीत होत्या. सकाळी साडेदहा-अकरा वाजता बँका उघडल्यापासून दुपारी दीड वाजेपर्यंत कामकाज बंद होते. त्यामुळे बँकांत लांबच्या लांब रांगा लागल्याचे चित्र दिसले. सकाळी 11 वाजल्यापासून अनेक वृध्द ग्राहकही रांगेत उभे असल्याचे दिसले. दुपारी दीड वाजता ही सेवा सुरु झाली. तब्बल अडीच तास कामकाज खोळंबले तर ग्राहकांना अडीच तास तिष्टत बसावे लागले. बाहेरगावाहून बँक कामकाजासाठी आलेले ग्राहकही बँकांचे कामकाज बंद असल्याने वैतागल्याचे दिसून आले. अनेकजण एटीएम च्या सेवेसाठी हेलपाटे घालत होते. इंटरनेट बंद असल्याने एटीएम सेवाही बंद होती. त्यातच लग्नसराईचे दिवस असल्याने व बँकांचे कामकाज, एटीएम सेवा बंद असल्याने त्याचा फटका कांही व्यापार्‍यांनाही बसला. वारंवार सेवा खंडीत होणे, रेंज नसणे आदी कारणांमुळे सध्या बी.एस.एन.एल.चे ग्राहक वैतागले असून अखंड अशी सेवा देण्याची मागणी ग्राहकांतून होत आहे.